စကားလုံးများ၏ အဓိပ္ပာယ်ကို လေးလေးနက်နက် တွေးခေါ်ဆင်ခြင်နိုင်မှသာ ပညာရှိဟု ဆိုနိုင်ပါသည်။ ပညာတတ်ဆိုသည်မှာ အရေးကြီးသော စကားရပ်များကို သေသေချာချာ နားလည်ပြီးမှ လေးလေးနက်နက် သုံးစွဲလေ့ရှိကြပါသည်။ “သာသနာ” ဟူသော စကားလုံးကို လေ့လာကြည့်လျှင် သာသနာဆိုသည်မှာ “မြတ်စွာဘုရားရှင်၏ အဆုံးအမ” ကို ဆိုလိုခြင်း ဖြစ်ပါသည်။

ထို့ကြောင့် တချို့သုံးနှုန်းနေကြသည့် “သာသနာပြုသည်” ဟူသော စကားကို ဆင်ခြင်ကြည့်စရာ ရှိလာပါသည်။ ဤစကားသည် သာသနာကို ပြုပြင်သည် (သို့မဟုတ်) သာသနာ (အဆုံးအမ) အသစ် ပြုလုပ်သည်ဟု အဓိပ္ပာယ် ထွက်သွားနိုင်ပါသည်။ တကယ်တမ်းတွင် မြတ်စွာဘုရား၏ အဆုံးအမသည် မည်သည့်အရာမျှ ထပ်မံပြုပြင်ရန် မလိုသလို၊ မိမိကိုယ်ပိုင် အဆုံးအမများဖြင့် အသစ်လုပ်မည်ဆိုလျှင်လည်း မူလသာသနာကို ဖျက်ဆီးရာသာ ရောက်သွားပါလိမ့်မည်။ ထို့ကြောင့် “သာသနာပြုသည်” ဟူသော စကားရပ်မှာ အသိဉာဏ်ရှိသူ ပညာတတ်များအနေဖြင့် လုံးဝ မသုံးနှုန်းသင့်သော စကားဖြစ်ပါသည်။

နှစ်ပေါင်း ၂၅၀၀ ကျော် ကြာမြင့်လာပြီဖြစ်သော သာသနာတော်တွင် ကျွန်တော်တို့ လုပ်နိုင်သည့်အလုပ်မှာ မသန့်စင်တော့သည့် အစိတ်အပိုင်းများကို တတ်နိုင်သမျှ ပြန်လည်သန့်စင်ပေးရန်သာ ဖြစ်ပါသည်။ ထိုသို့ လုပ်ဆောင်ရာတွင်လည်း သာသနာအတွက် တကယ် အလုပ်လုပ်ချင်သည်ဆိုလျှင် သာသနာ၏ အနှစ်သာရဖြစ်သော သံသရာမှ လွတ်မြောက်ကြောင်း ‘ပထမမဂ်’ ကို အရင်ဆုံး ရရှိအောင် ကြိုးစားပြီးသူများသာ ဖြစ်သင့်ပါသည်။ ပုထုဇဉ်ဘဝဖြင့် အပါယ်လေးပါးကို ရင်းပြီး သာသနာအတွက်ဆိုကာ လုပ်ဆောင်နေခြင်းသည် မြတ်စွာဘုရားရှင်၏ အလိုကျ မဟုတ်ပါ။

အမျိုး၊ ဘာသာ ဟူသော ပုထုဇဉ်သဘာဝ စွဲလမ်းမှုများနှင့် ထိုမှတစ်ဆင့် ဖြစ်ပေါ်လာသည့် အကုသိုလ်များအပေါ် သံဝေဂရရန်သာ ရှိပါသည်။ “သာသနာအတွက် အသက်ပေးမည်၊ ငရဲကျခံမည်” စသည့် အစွန်းရောက် ပြောဆိုလုပ်ကိုင်မှုများသည် လုံးဝ မလိုအပ်သည့်အပြင် သာသနာအတွက် အနှောင့်အယှက်များသာ ဖြစ်စေသည်ကို စေတနာရှင်တိုင်း သတိပြုမိစေချင်ပါသည်။

သာသနာအတွက် အနစ်နာခံစရာ မလိုပါ။ မိမိကိုယ်တိုင် သာသနာ၏ အကျိုးကျေးဇူးဖြစ်သော မဂ်ဉာဏ်၊ ဖိုလ်ဉာဏ်ကို အရင်ဆုံး ရရှိအောင်သာ ကြိုးစားရမည် ဖြစ်ပါသည်။ အရိယာပုဂ္ဂိုလ် ဖြစ်သွားပြီဆိုလျှင်တော့ မည်သည့်သတ်မှတ်ချက်မျှ မရှိတော့ဘဲ မိမိဆန္ဒအလျောက် သာသနာအကျိုးကို ဆက်လုပ်ချင်လည်း လုပ်နိုင်သလို၊ အထက်မဂ်ဖိုလ်များသို့ ဆက်လက်ကူးချင်လည်း ရပါသည်။ အရိယာ ဖြစ်သွားသူများသည် ကြည်ညိုစရာသာ ရှိပြီး ဆရာလုပ် သင်ပြပေးစရာ မလိုတော့ပါ။

မြတ်စွာဘုရားရှင်၏ အဆုံးအမတော်များသည် အင်မတန် တန်ဖိုးကြီးမားလှပါသည်။ ဤအဆုံးအမများကို အမှိုင်းအစေးကင်းပြီး သန့်စင်နေအောင် ထိန်းသိမ်းကြိုးစားခြင်းသည် နောင်လာမည့် မျိုးဆက်ပေါင်းများစွာအတွက် အကောင်းဆုံးသော အကျိုးပြုမှုပင် ဖြစ်ပါသည်။

ထို့ကြောင့် မိတ်ဆွေများအနေဖြင့် မိမိတို့၏ ကောင်းမြတ်သော စိတ်စေတနာများကို အကျိုးအရှိဆုံးဖြစ်အောင် အသုံးချပြီး သာသနာတော်အတွက် နည်းလမ်းတကျ မှန်မှန်ကန်ကန် အလုပ်လုပ်နိုင်ကြပါစေဟု ဆန္ဒပြုတိုက်တွန်းလိုက်ပါသည်။